Íþróttabandalag Hafnarfjarðar

Laugardaginn 2. apríl stendur ÍSÍ fyrir leiðbeinendanámskeiði sem gefur réttindi til kennslu í stafgöngu (skv. stöðlum Alþjóða stafgöngusambandsins).

Námskeiðið verður haldið í fundarsal ÍSÍ í Íþróttamiðstöðinni í Laugardal og stendur frá kl. 9:00 - 17:00.

ÍBH vill vekja athygli á ráðstefnu um heilsutengda ferðaþjónustu í Hafnarfirði sem verður haldin í Flensborgarskólanum 2. apríl nk. Með ráðstefnunni er verið að leiða saman ólíka aðila innan bæjarins og kynna þeir hvaða þjónustu þeir hafa upp á að bjóða eða gætu haft upp á að bjóða fyrir ferðamenn sem vilja dvelja í Hafnarfirði. ÍBH hvetur fólk úr aðildarfélögunum til að mæta á ráðstefnuna, hlusta á umræður og taka þátt í að gera Hafnarfjörð að aðlaðandi stað sem er áhugavert að heimsækja. Dagskrá ráðstefnunnar er hér.

Málþing um íþróttir og opnun 80 ára Sögusýningar Hauka

Laugardaginn 26. mars kl: 10.00 – 14.00

Í tilefni af 80 ára afmælis Knattspyrnufélagsins Hauka verður haldið málþing í  veislusalnum að  Ásvöllum undir yfirskriftinni “íþróttir fyrir alla”

Að loknu málþingi verður opnuð Sögusýning Hauka sem spannar 80 ára sögu félagsins.

Í dag úthlutaði stjórn Afreksmannasjóðs ÍBH styrkjum til aðildarfélaga ÍBH vegna stórmóta á árinu 2010 samtals kr. 1.300.000 við athöfn í Álfafelli Íþróttahúsinu við Strandgötu að viðstöddum bæjarstjóranum í Hafnarfirði Guðmundi Rúnari Árnasyni, bæjarfulltrúum, formönnum, deildarformönnum og íþróttafólki þeirra félaga sem fengu úthlutað styrkjum. Alls voru  þetta 20 verkefni  frá 5 íþróttafélögum og 6 íþróttadeildum íþróttagreina. 

Íþróttabandalag Hafnarfjarðar (ÍBH), Hafnarfjarðarbær og Alcan á Íslandi gerðu í gær með sér nýjan samning til styrktar barna- og unglingastarfi íþróttafélaganna í Hafnarfirði. Fyrsti samningurinn var tímamótasamningur og tók gildi í ársbyrjun 2002 til þriggja ára, heildarupphæð hans var 24 milljónir króna. Samningurinn hvetur íþróttafélögin m.a. til að ráða til sín vel menntaða og hæfa þjálfara og til gerð námskrár fyrir starfsemina með þann tilgang að efla gæði starfsins. Í nýjum samningi sem gildir til ársloka 2013 hækkaði Alcan framlag sitt um 50% úr 6 milljónum króna í 9 milljónir á ári, auk þess sem önnur framlög frá fyrirtækinu eru metin á 3 milljónir króna á samningstímanum. Framlag Hafnarfjarðarbæjar verður óbreytt næstu þrjú árin þ.e. 6 milljónir króna á ári. Heildarupphæð samningsins er 48 milljónir króna. ÍBH vill við þessi tímamót þakka bæði Hafnarfjarðarbæ og Alcan á Íslandi fyrir þennan mikilvæga stuðning og vonar að hann haldi áfram að efla frábært íþróttastarf í bæjarfélaginu. Samninginn er hægt að sjá í heild sinni á heimasíðu ÍBH undir samningar. Undirritunin fór fram á árlegri Íþrótta- og viðurkenningarhátíð Hafnarfjarðarbæjar og á myndinni eru frá vinstri Ingvar S. Jónsson íþróttafulltrúi Hafnarfjarðarbæjar, Hrafnkell Marinósson formaður ÍBH, Gunnar Rafn Sigurbjörnsson staðgengill bæjarstjórans í Hafnarfirði, Rannveig Rist forstjóri Alcan á Íslandi og Ólafur Teitur Guðnason framkvæmdastjóri samskiptasviðs Alcan á Íslandi.