Í dag úthlutaði stjórn Afreksmannasjóðs ÍBH styrkjum til aðildarfélaga sinna vegna stórmóta á árinu 2008. Kallað var eftir umsóknum frá félögunum vegna þátttöku í stórmótum og var umsóknarfresturinn 5. desember 2008.
Á myndinni eru frá vinstri Hrafnkell Marinósson formaður ÍBH, Jón Gestur Viggósson gjaldkeri Afreksmannasjóðs, Ágúst Sindri Karlsson formaður Afreksmannasjóðs og Lúðvík Geirsson bæjarstjórinn í Hafnarfirði.
Við athöfnina tók Lúðvík Geirsson bæjarstjóri í Hafnarfirði til máls og bar lof á það góða starf sem íþróttafélög bæjarins inna af hendi. Mikill iðkendafjöldi og frábær árangur bera þess glökkt vitni. Hafnarfjarðarbær kemur til með að leggja sitt af mörkum við að tryggja grunnstoðir íþróttafélaganna, en eins og er verða allir að taka á sig skerðingar og leggja sitt af mörkum á meðan þjóðin vinnur sig út úr þeim efnahagsþrengingjum sem við stöndum frammi fyrir.
Forseti ÍSÍ Ólafur Rafnsson og framkvæmdastjóri ÍSÍ Líney Rut Halldórsdóttir heimsóttu í dag Ásvallalaug og kynntu sér þetta glæsilega íþróttamannvirki. Ásvallalaug var vígð með fjölmennri athöfn 6. september 2008. Í Ásvallalaug eru tvær sundlaugar ein 50m x 25m keppnislaug og önnur 16 2/3m x 10m kennslulaug, auk vaðlaugar, heitra potta og vatnsrennibrautar. Tvö íþróttafélög, Sundfélag Hafnarfjarðar og Íþróttafélagið Fjörður hafa æfinga-, keppnis- og félagsaðstöðu í mannvirkinu. Líkamsræktarstöðin Hress er með heilsurækt í húsinu. Auk þess má einnig nefna sjúkraþjálfun sem fyrirtækið Ásmegin rekur. Sundlaugarnar og öll aðstaða í mannvirkinu hefur verið vel sótt af Hafnfirðingum og öðrum gestum í vetur.
