Hrafnkell Marinósson formaður ÍBH og Bergsteinn Hjörleifsson gjaldkeri ÍBH afhendu silfur- og gullmerki ÍBH til einstaklinga sem skarað hafa fram úr í störfum fyrir íþróttahreyfinguna í Hafnarfirði í að minnsta kosti áratug. Aðildarfélög ÍBH tilnefna fólk úr sínum röðum til stjórnar ÍBH. Silfurmerki ÍBH hlutu eftirtaldir einstaklingar, Sigurður Emil Ævarsson Hestamannafélaginu Sörla, Gísli Þór Magnússon Knattspyrnufélagið Haukar, Helgi Kuldepp Kumar Knattspyrnufélagið Haukar og Sigurbjörn Jónsson Knattspyrnufélagið Haukar. Gullmerki ÍBH hlutu eftirtaldir einstaklingar, Ruth Guðmundsdóttir Knattspyrnufélagið Haukar og Hafsteinn Ellertsson Knattspyrnufélagið Haukar. Myndin sýnir Hrafnkel, Ruth Guðmundsdóttir og Bergstein.
48. þing ÍBH fór fram laugardaginn 27. apríl sl. í Álfafelli Íþróttahúsinu við Strandgötu. Hrafnkell Marinósson formaður ÍBH setti þingið og vakti m.a. athygli þingfulltrúa á nýjum sjálfboðaliðavef ÍSÍ. Fimmtíu þingfulltrúar frá 15 aðildarfélögum ÍBH sátu þingið ásamt gestum. Þingið var að mestu rafrænt og er þetta í fyrsta skipti sem það er reynt. Undir liðnum ávörp gesta tóku til máls, Guðrún Ágústa Guðmundsdóttir bæjarstjórinn í Hafnarfirði, Gunnar Bragason stjórnarmaður úr framkvæmdastjórn ÍSÍ og flutti hann kveðju frá forseta ÍSÍ og framkvæmdastjórn ÍSÍ, Ársæll Guðmundsson skólameistari Iðnskólans í Hafnarfirði og Einar Birgir Steinþórsson skólameistari Flensborgarskólans í Hafnarfirði. Þingið samþykkti m.a. tillögu um að óska eftir því að hefja viðræður við Hafnarfjarðarbæ um endurskoðun á samstarfssamningi ÍBH við Hafnarfjarðarbæ. Einnig var samþykkt ályktun um byggingu íþróttahúsa í Hafnarfirði með hvatningu til bæjaryfirvalda um að staðsetja íþróttamannvirki á lóðum eða við íþróttafélögin í stað þess að velja þeim stað við skólabyggingar vítt um bæinn. Ennfremur var samþykkt tillaga um launakerfi fyrir íslenskt afreksíþróttafólk með hvatningu til ÍSÍ um að hefja viðræður við íslenska ríkið um launakerfi fyrir íslenskt afreksíþróttafólk ásamt mörgum fleiri áhugaverðum tillögum sem verða birtar í þinggerð þingsins. Stjórn ÍBH er skipuð fulltrúum frá hverju aðildarfélagi bandalagsins og eru þau orðin sautján talsins. Fimm fulltrúar gengu úr stjórn ÍBH að þessu sinni og eru það þau Guðbjörg Norðfjörð Elíasdóttir Haukum, Sigurður Emil Ævarsson Sörla, Írena Ásdís Óskarsdóttir BH, Kristján Geir Mathíesen AÍH og Ágústa Hera Birgisdóttir HFH, er þeim öllum þakkað fyrir góð störf í þágu hafnfirskrar íþróttahreyfingar. Á þinginu voru eftirtaldir aðilar heiðraðir með silfurmerki ÍBH fyrir a.m.k. áratuga starf fyrir hafnfirska íþróttahreyfingu, Sigurður Emil Ævarsson Hestamannafélaginu Sörla, Gísli Þór Magnússon Knattspyrnufélaginu Haukum, Helgi Kuldepp Kumar Knattspyrnufélaginu Haukum og Sigurbjörn Jónsson Knattspyrnufélaginu Haukum. Tveir einstaklingar voru heiðraðir með gullmerki ÍBH fyrir a.m.k. tuttugu ára starf fyrir hafnfirska íþróttahreyfingu, þau voru Ruth Guðmundsdóttir Knattspyrnufélaginu Haukum og Hafsteinn Ellertsson Knattspyrnufélaginu Haukum. Íþróttabandalag Hafnarfjarðar óskar þeim til hamingju og þakkar þeim innilega fyrir þeirra störf í þágu hafnfirskrar íþróttahreyfingar. Þingforseti var Jón Gestur Viggósson fyrrum stjórnarmaður í ÍBH og núverandi stjórnarmaður í framkvæmdastjórn ÍSÍ og stýrði hann þinginu af röggsemi og eru honum færðar bestu þakkir fyrir. Að loknum þingstörfum bauð bæjarstjórn Hafnarfjarðar þingfulltrúum til móttöku í Byggðarsafn Hafnarfjarðar. Myndin að ofan sýnir þingfulltrúa að störfum.
Stjórn Afreksmannasjóðs ÍBH úthlutaði í dag styrkjum til aðildarfélaga ÍBH vegna stórmóta á árinu 2012 að upphæð kr. 2.760.000. Kallað var eftir umsóknum frá félögunum vegna þátttöku í stórmótum og var umsóknarfresturinn 10. desember sl. Í ár voru 36 verkefni metin styrkhæf. Sjóðurinn veitir styrki m.a. til almenns íþróttastarfs í formi ferðastyrkja og afreksstarfs sem felst m.a. í fjárstyrk upp í kostnað vegna þátttöku á heimsmeistaramótum, Ólympíuleikum og Evrópumótum / -keppnum.
Íþrótta- og viðurkenningarhátíð Hafnarfjarðarbæjar 2012 fór fram í dag í Íþróttahúsinu við Strandgötu. Veittar voru viðurkenningar til einstaklinga sem urðu Íslandsmeistarar með hafnfirskum íþróttafélögum á árinu 2012, en samtals voru það 507 einstaklingar úr 21 íþróttagrein, frá 11 íþróttafélögum af 17 innan ÍBH. Flestir titlar í grein í félagi unnust í knattspyrnu hjá Fimleikafélagi Hafnarfjarðar. FH fékk 57,6% titlanna, Sundfélag Hafnarfjarðar átti 12,4% og Knattspyrnufélagið Haukar 8,7%, önnur íþróttafélög voru með minni hlutdeild.
