Íþróttabandalag Hafnarfjarðar

Senn líður að Unglingalandsmóti UMFÍ sem er haldið ár hvert um verslunarmannahelgina. Í ár er það haldið í Borgarnesi. Börn á aldrinum 11 – 18 ára mega keppa í öllum greinum sem í boði eru. Keppnisgreinar eru dans, frjálsíþróttir, glíma, golf, hestaíþróttir, knattspyrna, körfubolti, motocross, skák og sund. Keppnisgreinar fatlaðra eru sund og frjálsaríþróttir. Kynning verður á rathlaupi og parkour. Einnig er mikið lagt upp úr fjölbreyttri afþreyingu fyrir alla fjölskylduna. Á mótinu keppa þátttakendur fyrir sitt héraðssamband eða íþróttabandalag. Mótsgjald fyrir keppendur er kr. 6.000 og með því fá þeir þátttökurétt í allar keppnisgreinar. Skráning keppenda hófst mánudaginn 12. júlí og lýkur á miðnætti föstudaginn 23. júlí, skráningargátt er á heimasíðu UMFÍ. Framkvæmdastjóri mótsins er Ómar Bragi Stefánsson gsm 898-1095 og netfang Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. . Verkefnisstjóri mótsins er Margrét Baldursdóttir gsm 699-3253 og netfang Þetta tölvupóstfang er varið gegn ruslpóstsþjörkum, Þú verður að hafa JavaScript virkt til að sjá það. . ÍBH hvetur aðildarfélögin til að fara inn á heimasíðu UMFÍ og kynna sér Unglingalandsmótið og vekja áhuga hjá iðkendum og forráðamönnum þeirra á þátttöku í þessari glæsilegu íþrótta- og fjölskylduhátíð. Nánari upplýsingar um mótið er að finna á heimasíðu UMFÍ www.umfi.is.

Intersport – Hálfkarlinn 2010 fór fram í Hafnarfirði sunnudaginn 11. júlí sl í logni og sól. Að þessu sinni tóku 33 keppendur þátt, 31 einstaklingar og 2 lið. Til fróðleiks má geta þess að hálfkarlinn er 1,9 km sund, 90 km hjólreiðar og 21,1 km hlaup og mikil þrekraun. Að keppninni stóðu Sundfélag Hafnarfjarðar, þríþrautardeild með aðkomu Þríþrautarsambands Íslands og Íþróttabandalag Hafnarfjarðar. Veðrið lék við keppendur og náðist góður árangur á mótinu.

 

Alcan á Íslandi hf og Hafnarfjarðarbær færðu í dag fulltrúum íþróttafélaga innan ÍBH fjármuni til styrktar barna- og unglingastarfi félaganna við athöfn í höfuðstöðvum Alcan í Straumsvík. Á milli ÍBH, Alcan og Hafnarfjarðarbæjar hefur verið í gildi samningur frá árinu 2001 um stuðning við íþróttastarf félaganna fyrir 16 ára og yngri iðkendur. Á myndinni eru forstjóri Alcan á Íslandi Rannveig Rist, bæjarstjórinn í Hafnarfirði Lúðvík Geirsson ásamt fulltrúum íþróttafélaganna sem hlutu styrki.

Hvatningar- og átaksverkefni ÍSÍ "Hjólað í vinnuna" er lokið. Hafnarfjörður endaði í þriðja sæti í keppni milli sveitarfélaga með 4380 daga og 52321kílómetra. Reykjavík sigraði með 43728 daga og 471633 kílómetra, Akureyri varð í öðru sæti með 5800 daga og 34760 kílómetra. Í keppni fyrirtækja með 400 starfsmenn eða fleiri sigraði Rio Tinto Alcan. Hrafnista í Hafnarfirði varð hlutskarpast í flokki fyrirtækja með 150 til 399 starfsmenn. Í flokki fyrirtækja með 70 til 149 starfsmenn varð Hvaleyrarskóli sigurvegari. Öldutúnsskóli sigraði í flokki fyrirtækja með 30 til 69 starfsmenn. Í flokki fyrirtækja með 10 til 29 starfsmenn sigraði leikskólinn Norðurberg og í flokki fyrirtækja með 3 til 9 starfsmenn varð fyrirtækið Prógramm sigurvegari. ÍBH óskar öllum sigurvegurum til hamingju og hvetur alla til að halda áfram að hjóla. Nánari upplýsingar og úrslit er að finna á heimasíðu verkefnisins www.hjoladivinnuna.is.

Afhending framlaga vegna íþróttastarfs 16 ára og yngri út frá samningi ÍBH, Alcan á Íslandi hf og Hafnarfjarðarbæjar fer fram fimmtudaginn 3. júní kl. 15.00 í höfuðstöðvum Alcan á Íslandi hf í Straumsvík. Um er að ræða fyrri úthlutun til íþróttafélaganna að upphæð kr. 7.200.0000. Formenn íþróttafélaga og fulltrúar deilda sem sóttu um stuðning eða fulltrúar þeirra koma til með að veita framlögunum viðtöku.